सोलुखुम्बुःडिभिजन वन कार्यालय सोलुखुम्बुले वन्यजन्तुको आक्रमणबाट पुगेको क्षति बापत पीडितहरूलाई ४ लाख भन्दा बढी राहत रकम दिएको छ। आर्थिक वर्ष २०८२÷०८३ मा कार्यालयले विभिन्न शीर्षकमा ४ लाख ५७ हजार १७१ रुपैयाँ राहत क्षतिपूर्ति रकम दिएको डिभिजन वन कार्यालयका वन अधिकृत रामचन्द्र ठाकुरले जानकारी दिनुभयो।
   वन अधिकृत ठाकुरका अनुसार वन्यजन्तुको आक्रमणबाट गम्भीर घाइते भएका १ जना पीडितलाई ८२ हजार १७१ रुपैयाँ, अन्नबाली क्षति भएका १ जना पीडितलाई ९ हजार ५०० रुपैयाँ र पशुधन क्षति भएका ३२ जना पीडितहरूलाई ३ लाख ६५ हजार ५०० रुपैयाँ राहत रकम भुक्तानी भइसकेको छ। 
   त्यस्तै, अझै केही पीडितहरूलाई राहत रकम भुक्तानी हुन बाँकी रहेको छ। जसअन्तर्गत अन्नबाली क्षति बापत १ जना पीडितको ९ हजार ५०० रुपैयाँ र पशुधन क्षति बापत ६ जना पीडितको ५५ हजार रुपैयाँ भुक्तानी बाँकी विवरणमा रहेको र उक्त रकम पनि प्रक्रिया पुरा गरी हस्तान्तरण गरिने डिभिजन वन कार्यालय सोलुखुम्बुले जनाएको छ।